सीडीएमए बन्द गर्दै टेलिकम, प्रयोगकर्तालाई जीएसएममा सारिने

काठमाडौं । नेपाल टेलिकमले अब स्काई फोन अर्थात् (सीडीएमए) सेवा पूर्ण रुपमा बन्द गर्ने भएको छ । चालू आर्थिक वर्षको वार्षिक कार्यक्रममामार्फत कम्पनीले स्काईफोन बन्द गर्ने र त्यसमा रहेका प्रयोगकर्तालाई जीएसएम सेवामा रुपान्तरण गर्ने योजना ल्याएको हो ।

यसअघि रेडियो फ्रिक्वेन्सी नीति निर्धारण समितिले नै नेपाल टेलिकमले दिँदै आएको सीडीएमए सेवा सन् २०२२ बाट बन्द गर्ने निर्णय गरेको थियो । त्यसैका आधारमा टेलिकमले यस वर्षको वार्षिक कार्यक्रममा सीडीएमए माइग्रेसनलाई प्रमुख कार्यक्रमको रुपमा अघि बढाएको हो ।

‘हाल सीडीएमए फोन प्रयोगकर्तालाई जीएसएम टूजी, थ्रीजी र फोरजीमा रुपान्तरण गरिनेछ कार्यक्रम रहेको छ,’ टेलिकमका सह–प्रवक्ता कृष्णप्रसाद भण्डारीले भने, ‘यसलाई कम्पनीको यो वर्षको मुख्य कार्यक्रमकै रुपमा अगाडि बढाउन खोजेका छौं ।’